Premier registre de paroisse de Satigny, 1542-1634
Ce est le livre au quel sont redigez par escript les Baptesmes et mariages qu’ont estés administré et faictz depuys l’an 1542.
Ceste annee fust ordonné pour ministre et pasteur de ceste Eglise de Satignyz Jacques Bernard citoyen de Geneve et le 30. Jour du moy d’aout et presenté par maistre Jehan Calvin de Noyon, lecteur et prescheur en l’eglise de Geneve, à tout le peuple aussi ledict lieu, ainsi que toute la terre de Pigney est subject à Messieurs de Geneve depuys l’an 1535 quand les presbstres prirent fin, toute ydolatrie fust abattue et l’evangile fust presché librement et publiquement ainsi que Jesus Christ l’avoir commandé à ses apostre.
En ce lieu de Satigny dict le priorat s’assembler les villages de Satignyz, Burdignin, Choulyz, Pigney et Peysyz, pour ouyr les sermons, recepvoir les sacremens, et la saincte ordonnance du mariage.
L’ordre des sermons. Le Dymenche ont presche deux foys, le matin pour tout le peuple, et apres disner le catechisme des enfans se faict. Le mercedy aussi, et signamment durant le temps de la supplication.
Le baptesmes communement est administré le Dymenche apres disner au catechisme. La S. Cene, quatre foys l’annee, sçavoir à Pasques, à Pentecoste, la première Dymenche du moy de septembre et à la nativité de nostre Sauveur.
Le mariage, quand il plast à ceux qui se veullent espouser, soit le Dmenche, ou en sur septmaine, en preschant neantmoins. En ung chacun village est commist une Garde pour veiller sur les contempteurs de l’evangile, et transgresseurs des commandemens de Dieu et des ordonnances de la Seigneurie, pour le rapporter au ministre et de là au Consistoire si sont incorrigibles.
AEG E.C. Satigny 1
Suivez-nous !
Rejoignez notre communauté sur les réseaux sociaux