Plaintes des religieuses de Sainte Claire au sujet des dévastations commises dans leur Eglise (de la main de Jeanne de Jussie)
25 octobre 1534
Pour tres humble salut, Jhesus nostre Redempteur vous doint sa saincte grace et son amour.
Messieurs tres honnorés seigneurs nous tres aymees peres et conservateurs, plaise vos ne tenir à presumption la facherie que vous donnons par nous lettres, car il sommes contraintes pour vous advertir de nos indigences et doleances. Nous nous sommes myses soubz vostre protection et sauvegarde et en vous et à Messieurs nous confions entierement. Il est vray que hier à heure de vespres entrerent aulcuns en nostre esglise, non par devocion, mais faisant cris et brairie inpetueulx, pour nous enpechés le divin service, et prindrent une croix avecques aulcuns ymaiges, qui mirent par piece viollentement. Et ce ja la seconde fois que avons enduré tel insurte et grant fraieurs. Nous n’entendons pas que cela soit la notice à vostre Reverence, si nous en recomandons à vostre seignorie et begnyvolance, suppliant en toutes reverence, en l’honneur de Jhesuscrist et de ses doloreuses soffrances, qui vous plaise donné ordre que ne soions plus molestee de teulles insolance contre Dieu et raisons, et que l’ong nous laisse en paix faire le divin service, pour quel faire vollentairement nous sommes rencluses et donné à Dieu, prian jours et nuyt pour la conservation de la bonne cité et de vous, Messieurs, desirant continuel et de vivre et mory ycit en vostre convent, si vous plait nous il maintenir et conservés sans molestes, et de cecessit à genoulx et mains jointes vous supplions assurance et vostre noble volloir, car sens cela ne porrions vivre, veu l’espavantement que nous donons de ses insolance contre saincte Esglise. Et por la fin, nous recomandons tres humblement et en toutes reverence à vos bonnes graces et seignorie, prian Dieu vous donné tres bonne vie. Amen.
Du povre covent Madame saincte Clere, le XXV d’octobre, par les toutes entierement
Vous tres humbles filles orateresses
L’abbesse et les seurs religieuses dudict covent.
CH AEG P.H. 1140
Transcription: Jeanne de Jussie, Petite chronique, Einleitung, Edition, Kommentar von Helmut Feld, Mainz, 1996, ici revue.
Suivez-nous !
Rejoignez notre communauté sur les réseaux sociaux