« Les actes et gestes chrestiens et civilz de Genève et comment ils ont receu l’évangille, rédigé par escript en manière de chroniques annuales ou histoyres par Anthoine Froment » (1549-1550)
Récit de novembre 1532
[…] et de mettre des billets par tous les carefours de la ville (qu’on appelle escripteaux) affin qu’il peult commencer à prescher dans Geneve; la teneur des billets estoit telle:
Il est venu ung homme en ceste ville qui veult enseigner à lire et escripre en Françoys dans ung mois, à tous ceulx et celles qui vouldront venir, petites et grands hommes et femmes, mesme à ceulx qui iamais ne fuent en escolle. Et si dans le dit mois ne scavent ni lire et escripre ne demande rien de sa peine. Lequel trouveront en la grande salle du Boytet, près du Mollard, à l’enseigne de la Croix d’or. Et si guerit beaucop de malladies pour neant.
Quand les escripteaux furent placquez et mis parmy la ville, ung cahscun selon son advis en lectoit sa sentence, les ungs en bien, les aultres en mal. Les ungs disoyent; ie l’ay ouy parler, mais il dict bien: des aultres disoyent; c’est un de ces mechans Lutheriens qui nous veult abuser: et des aultres c’est un dyable qui enchante tous ceulx qui le vont ouyr, car incontinent qu’on la ouy il enchante les gens. Si est ce neantmoins qu’ils ne peulrent tant faire qui n’eux beaucop d’enfant à enseigner : ausquels monstroit non seullement à lire et à escripre, mais sa Religion, leur faisant tous les iours un ou deux sermons de la Ste Escripture au nouveau Testament. De quoy estoient fort estonnez, car iamais n’avoient ouy telle doctrine: laquelle chose les enfans racomptoyent à leurs peres et meres, et à plusieurs aultres hommes et femmes parmy la ville, les incitant à venir ouyr cest homme, qui estoit venu de nouveau: car il enseigne disoyent ils tout aultrement que les Prebstres et aultres n’ont accoutumé de faire: et à la relaxion de ces enfans plusieurs hommes et femmes l’alloyent ouyr prescher, en celle salle, les ungs par curiosité et moquerie, les aultres pour estre instruits: mais non pas sans grandes murmures moqueries et contredictions, les ungs contre les aultres. Touteffoys le nombre d’iceulx croissoit et augmentoit grandement de iour en iour, et ceulx qui l’oyoyent et concepvoient en leur cueur quelque intelligence exortoyent leurs parens amis et voysins, et le amenoyent par subtils moyens pour ouyr cest homme.
CH AEG Mss. hist. 5, f. 27r.-27v.
CH AEG Mss. hist. 5, f. 28r.
Transcription: Les Actes et Gestes merveilleux de la Cité de Genève par Anthoine Fromment, mis en lumière par Gustave Revilliod, Genève, 1854, pp. 13-15.
Suivez-nous !
Rejoignez notre communauté sur les réseaux sociaux