La foudre s’abat sur la croix du clocher de Saint-Piere
10 août 1556
Fouldre au clochier S. Pierre du rologe [horloge] a pointe. Icy Thivent de Baptista, guex, a hurté à la porte annunçant que le feu estoit en la pointe du clochier S. Pierre. Parquoy promptement chacun s’est levé pour aller au secours.
Or, comme on a trouvé et veu occulairement et moymesmes ay visité, estans faitz grands toneres la foudre a frappé sus le pomeau de cuyvre doré d’or, estant dessoubz la croix du clochier pointu de S. Pierre, lequel pomeau elle a percé de part en part faisant ung pertuys rond de la grosseur de deux doigs et de là est entré dedans le clochier en apres avoir quelque temps fumé, la flamme en est sortie et a bruslé depuys la pointe jusques à la cloche du reloge. Tellement que ladite croix est tumbee sus le toit de la crotte [grotte] S. Pierre et a percé ledit toit sans totesfois percer la crotte. Il y a heu une douzaine de compagnons estans aux clervoys dudit clochier et là où estoit ce feu, lesquelz a l’ayde de Dieu ont heu grande peyne et en grand dangier comme environnez de feu. Tellement que Dieu est à remercier qu’ung tel dangier ne se soit estendu plus loing et entre aultres choses ceste cy est notable que la munition et poudre estant au dessus et au sougon de la chapelle du Cardinal a esté subitement transporté en la maison de la Ville. Et les greniers estans dessoubz preservez indemnez combien que le feu soit tombé à quatre ou cinq pieds prez du lieu de ladite munition. On a employé grande quantité de vin pour esteindre le feu. L’eau ny a pas fally, graces à Dieu, veu mesmes que pendant ledit ovaille* il n’a cessé de pleuvoir fort.
De sorte qu’en tout tel accident nous povons recuillir une grand bonté de Dieu de nous avoir si gratieusement visitez veu que c’estoit honte que telle croix et comme marque ou enseigne de la diablerie papalle fut là laissee.
Et generalement nous avons à nous humilier recognoissans la main forte du Seigneur et le prier de detourner son ire en dessus noz pechez, nous recevant a sa misericorde et preservant par sa bénignité à son honneur et gloire avancement de son Eglise et de ceste pauvre cité et republique et à la confusion de ses ennemys meschans ennemis et qui de ses verges se moqueront ou en auront rejouissance.
* Catastrophe naturelle (tempête, gel, incendie, etc.).
CH AEG R.C. 51, f. 255v.-256r.
