Le livre de la sédition, Antoine Froment :
La confession de François Daniel Berthelier,
frère de Philibert Berthelier (Le Jeune)
(r)Les parolles de repentence de François Daniel Berthelier quil dict le jour qu’il fust executé incontinent ung peu apres que sa mort luy fust adnuncée en prison cependant que les ministres le consolloient en la presence de beaucoup de gens de bien le XI de septembre 1555 et avoit faict son testatment (comme peulvent faire tous criminelz dans Genève de quel crime qe ce soit estant validé que se n’estoient criminelz ou comme s’il estoit mort en son lit). Il prie tous ceulx qui illec estoient presens d’invocquer et prier dieu avec luy, disant il congnois et confesse de present la grande providence de Dieu sa grande verité et misericorde qu’il a heu envers moy que j’aye esté icy mitz prisonnier car si je fusse mort aultrement ou en mon lict ou d’ung cop d’acquebute je m’en alles dampné et perdu à cause de mon obstination. Helas que j’ay desgourgé des maulx contre Dieu contre sa parolle et (1mot :l’uns) aultres ministres et principallement contre uns M. Calvin non seullement icy avec mes compagnons mais mesme aux papistes lesquelz eussent faict leur proffit de la parolle de Dieu s’ilz l’eussent heue comme je l’avoys en abundance de laquelle je n’ay pas faict mon proffit. Toutesfoys je suis tant asseuré aux promesses de Dieu que j’auray de luy misericorde de mes pechez par la mort et effusion du sang de Jesuchrist quil a espandu pour moy et est mort pour adnillier toutes les faultes et pechéz de tous ceulx qui ont foy en luy et asseurance aux promesses de nostre Dieu. Alors Calvin luy dict : c’est tres bien dict mon frere et ami, mais que ce ne soit de cueur double. Helas dict il ce n’est pas icy ne l’heure où il fault avoir le coeur double ne faint mais fault avoir ung coeur contrict et humilié et croyes tous certainement que combien que je ne scache pas si bien dire que je l’entens si est ce que je suys asseuré que mon Dieu mon pere (v)ne regardera pas aujourd’huy mes pechés et recognoissans que j’ay faict mais la bonté seulle de son filz Jesus Christ qui est mon seul intercepteur et advocat envers ce bon père, aussi je le prie en playne foy et asseurance qu’il ne me veuille pas impunier mes faultes et pechés car s’il les m’en imputoit je seres dampné et perdu ce qu’il ne faict pas à ses enfans croyans ainsi que je fais, mais ce bon Dieu ne demande aultre chose sinon que le pouvre pecheur se repente et qu’il se retire à luy en pleyne foy et asseurance de ses promesses ausquelz je me fie et croys perfectement que le ciel et la terre passeront mais les promesses de nostre Dieu ne passeront point et cela je confesse de cueur d’avant vous tous et davant mon Dieu qui demande ung cueur contrict abbatu et simple et humilié et non point ung cueur double comme j’ay dict aussi certes je congnus qu’il le m’a bien chargé par son sainct esperit et se soys asseuré que de present il m’a faict misericorde et m’a chargé mon coeur maulvais et double que jamays en ung coeur doux et amyable et au lieu que l’on estoit allé pour le prescher et consoller, il preschoit et admonestoit les aultres voyre jusques à faire larmoyer les ministres et ceulx qui estoyent presens. Et encores estant au gibet il disoit : je vous prie tous mes amys de me pardonner ainsi que je pardonne à tous et prie ung chascun de prier Dieu pour moy affin quil me donne la grace d’avoir patience et de perseverer jusques à la fin en la foy et asseurance quil m’a desia donné de me saulver et d’estre aujourd’huy avec luy vous prians tous au nom de Dieu de suyvre sa saincte parolle de la bien ouyr et frequenter et de non la mespriser comme j’ay faict parcy devant car si je l’eusse suyvie ainsi que je debvoys faire je ne fusse pas icy comme vous me voyé en espectacle à tous et en luy donnant a boyre de la malvesie dict ce n’est pas le breuvage qu’on donna à boyre à Jesus Christ Sa disoit il ce n’est pas icy le lieu où il fault parler en faintize c’est maintenant l’heure qui me fault parler avec Dieu et en disant cecy la teste fust quasi plus tost bas que le mot proferé.
CH AEG Mss. hist. 6, f. 51.r-51v.
