« Divers inventaires des joyaux, meubles et effets trouvés dans les églises de Genève et leurs dépendances lors de la Réformation »
17 août 1535
Inventoyre faictz des Joyaulx de l’esglise sainct Pierre par messgrs les Sindicques assistantz d’iceulx les seigneurs sindicques Chicand et Philippin et Noble Glaude Savoex et Loys Dufour conseillers commis, present Reverend seigr Michiel Nauis chanoyne, messire Pierre Falconet, Jaques Morel et plusieurs aultres tesmoings assistant.
Messire Jaques Morelli ovrier d’icelle esglise revelle qu’il y a de perdu les pieces suyvantes.
Premierement la croix d’argent doré prinse au petit autel dernier le grand au bordon.
Item dedans l’armayre aupres de la porte du Revetisseur a esté pris ung calice, la coppe d’argent le pied pomeau et patene d’aultre matiere argentée.
Item audictz lieu a esté prinse la patene doree dor du calice du grand autel.
Item audictz lieu a esté prinse une bourse blanche a deux enchatres et en icelle la somme de vingtz et quatre solz en argent d’offertoyre.
Item auditz lieu on esté prinses deux ayguyeres d’estain.
Item auditz lieu priins deux chandelliers de fer.
Item auditz lieu une boyte et dedans icelle une livre de ensayn.
Item audit lieu prins unes torqueyses et ung martellet avecques quelques aultres besoignes.
Item un grand chandellier devant le grand autel prins troys grands syres du poys l’environ 30 livres.
Item au grand aultel (sic).
Item vers le grand crucifix en deux queysses douze chandoylles de syre du poys l’environ 15 livres.
Item en l’armeyre de sainct Anthoenne prins les relyqueyres de S. Alex d’argent fin, les relyques enchassés dans cristallin, aussi le reliquayre de sainct Anthoenne en argent ou cuyvre doré.
Item audict armeyre une bourse de damas ver, en ycelle plusieurs reliques.
Item audict armeyre prins ung calice et une tasse d’estain.
Item prins en l’armeyre de la chappelle de Nostre Dame 3 ampolles d’estain ou hon reposoit la saincte Creme, et chescune tenoyt l’environ deux quarterons. Prins aussi audict lieu troys petys flascons d’estain.
Dedans le revetisseur sont estés trovés les joyaulx suyvant.
Premierement une rose d’argent dorée avec son pied de cuyvre dorée.
Item deux grands bastons d’argent.
Item le test (texte) de l’evangille d’argent quelque peult doré.
Item une table d’argent en la quelle a ung crucifix out sont des reliques.
Item une main et ung pied d’argent a folliage.
Item ung offertoyre d’argent que se porte aux Roys et dedans ung reliquayre d’argent doré out il az une dent de sainct Pierre.
Item ung reliquayre de cuyvre doré out il az des reliques.
Item une table d’argent et dedans de boys au quel est sainct Bartholomé doré.
Item ung offertoyre d’argent pour les Roys.
Item ung escrin de boys argenté ou sont dez reliques des Innocentz; c’est ung pied.
Item une petite boyte.
Item une petite croys d’argent avecque son pied doré et dedans quatre pieces de boys de la Croix.
Item deux chandelliers, ung ensensier et une navete d’argent.
Item ung calice et sa patene d’argent doré de la chappelle de sainct Anthoenne qu’ast esté remys en l’arche d’icelle chappelle.
Item un baston d’argent out sont les armes de de Malvenda.
Item ung torribule d’argent doré ensemble navete d’argent doré.
Item ung collatere out il az ung fremault d’argent.
Item la paix d’argent doré a ung crucifix esmaillié.
Item la custode d’argent doré.
Item une Nostre Dame d’argent, le pied de cuyvre.
Item deux ayguyeres d’argent out sont les armes de Albie.
Item le grand messal les fremaulx d’argent.
Item une croys avec que son pied d’argent doré.
Item sainct Pierre avecque son pied et ses clefz d’argent doré.
Item une petite croys d’argent doré que l’on met a l’evesque disant messe, dans icelle du boys de la Croys.
Item deux petites ayguyeres de cristallin enchassés en argent doré.
Item deux petites queysses et ung reliquayre de boys covers d’argent doré.
CH AEG P.H. 1135, f. 1 à 3v.
Transcription: Inventaire des documents contenus dans les portefeuilles historiques et les registres des Conseils avec le texte inédit de diverses pièces de 1528 à 1541, publiés par F. Turrettini avec le concours de A.-C. Grivel , Genève, 1877, p. 120 et suivantes.
Suivez-nous !
Rejoignez notre communauté sur les réseaux sociaux